Գալիք Փառքը (Աստուծոյ Տունը Շինող – Բ. Մաս)

Յուսահատութիւն

Աստուած գիտէր, թէ ժողովուրդը վհատած էին: Ան ուղղակիօրէն հարցին վրայ մատ կը դնէ (Անգ 2.1-3):

Մարդիկ կային, որոնք տեսած էին հին տաճարը իր փառքով (Եզր 3.12): Ներկայի փլատակ վիճակին առջեւ յուսահատելով՝ անոնք տկար ինկած էին:

Շատեր իրենց անցեալի փառքը կը յիշեն երազանքով, եւ գալիք փառքին յոյսով չեն ապրիր: Ինչքան ալ քաջալերես, իրենց համար անցեալի փառքը «տարբեր» է: Այդպիսիները փլատակ վիճակ ունին եւ յուսալքուած են:

Աստուած Կը Զօրացնէ

Աստուած զանոնք մէկ-մէկ կը զօրացնէ Իր Խօսքով եւ անոնց յիշեցնելով (2.4-5).

·        Իր Փրկութիւնը

·        Իր խոստումը՝ Սուրբ Հոգին իրենց մէջ

·        Իր հաւատարմութիւնը

Աստուած անոնց ակնկալութիւնը կը լարէ մօտ ատենէն իր կատարելիքին (2.6-7), որպէսզի անոնց կեդրոնացումը հանէ անցեալէն եւ դնէ ապագային վրայ:

 

«Քիչ ատենէն նորէն երկինքն ու երկիրը, ծովն ու ցամաքը, բոլոր ազգերը պիտի շարժեմ: Բոլոր ազգերուն ցանկալի բաները պիտի գան եւ այս տունը փառքով պիտի լեցնեմ» (Անգ 2.6-7):

Աստուած կը յայտնէ այն մեծ գործը զոր Ի՛նք պիտի կատարէ իբր իրենց գործակիցը (2.6-9): Աստուած կը խոստանայ փառաւոր տուն մը (Գրծ 2.43-47):

Վերջին Տունը

«Վերջին տանը փառքը նախկինէն մեծ պիտի ըլլայ» (2.9):

Կարեւոր է տեսնես Աստուծոյ տեսածը: Կարեւոր է ատիկա ընդունիս հաւատքով:

Քրիստոսի մարմինն է «վերջին տունը»: Դուն կանչուած ես այս մարգարէութեան համաձայն: Ինչպիսի՞ն է քու շինելիք տունդ: Տեսա՞ծ ես զանիկա (Եզ 40.1-5): Քրիստոսի Մարմինին իւրաքանչիւր անդամ բաժին ունի «վերջին տան» փառաւորութեան մէջ:

Քու տեսիլքդ ճանչնալդ եւ ատոր մէջ քալելդ քեզի ամենամեծ խաղաղութիւնն է Տիրոջմէն (2.10):

Աստուած ցոյց կու տայ իր ողորմութիւնն ու սահմանած նոր սկիզբը իր ժողովուրդին (2.10-19):

Ան կ’ուզէ որ Իր ժողովուրդը ուշադրութիւն դարձնէ եւ հետեւի այն փոփոխութիւններուն որոնք պիտի պատահին իրենց կեանքերէն ներս (18-19):

Աստուած զօրութիւն, իշխանութիւն եւ յաղթութիւն  կը խոստանայ (2.20-22): Աստուած իր ամենակալ զօրութեամբ կը խոստանայ թշնամին շարժել, տապալել եւ փճացնել:

Զօրքերու Տիրոջ Ընտրեալը

«Այն օրը, կ'ըսէ զօրքերու Տէրը, քեզ պիտ առնեմ, ո՛վ Սաղաթիելեան Զօրաբաբէլ, իմ ծառաս, քեզ կնիքի պէս պիտի դնեմ, քանզի քեզ ընտրեր եմ» (Անգ 2.23):

Աստուած քեզ սահմանած է ըլլալ կնիքի պէս աշխարհին մէջ (2.23):

Դուն, Իր ծառան, Իր Թագաւորութեան դեսպանն ես (Բ. Կր 5.20): Ան քեզ ասոր համար ընտրած է:

Քու տունդ դեսպանատուն է: Քու ընտրութիւնդ այս փառաւոր կոչումին եւ պաշտօնին համար է (Ա. Պետ 2.9): Աստուծոյ Թագաւորութեան Կնիքը, զինանշանը եւ դրօշակը կը կրես: