Աստուծոյ Որդիներ (Ղկ 4.1-13)

Երբ Յիսուս մկրտուեցաւ, Սուրբ Հոգին երկնքէն իր վրայ հանգչեցաւ եւ Հայր Աստուած երկինքէն խօսեցաւ ըսելով՝ «Դուն ես իմ սիրելի Որդիս, քեզի հաւնեցայ» (Ղկ 3.22):

Մեր Որդիական ինքնութիւնը Աստուծմէ պարգեւ է... Բայց նաեւ փորձառութիւն է: Յիսուսի մկրտութենէն անմիջապէս ետք, Սուրբ Հոգին զինք տարաւ անապատ Սատանայէն փորձուելու համար (Մտ, Ղկ 4.1-2 հմմտ. Գղ 1.15-18):

Աստուծոյ ծրագիրն է Սատանային գործերուն վերջ դնել (Ա.Յհ 3.8): Ան պէտք ունի որդիներու որոնք ոչ միայն պարգեւ եւ հաճութիւն կը ստանան, այլեւ կարող են իրենց որդիական ինքնութեամբ քալելու:

Աստուած մեզի խոստացած է յաղթութիւն: Մենք Սուրբ Հոգիով լեցուած ենք եւ Սատանային գլուխը պիտի ջախջախենք: Սակայն Սուրբ Հոգին կարեւոր կը նկատէ նախ մեզի անապատ տանիլ:

Ո՞ւր է Անապատը

Յունարէնով՝ ἔρημος (erēmos), կը նշանակէ՝

·        Անբնակ, լքուած

·        Առանձնութեան տեղ

·        Չմշակուած եւ չկառուցուած վայր

Սուրբ Հոգին մեզ կը տանի «տեղեր» ուր՝

·        Ուրիշ մարդ չկայ

·        Ուրիշ զբաղում չկայ

·        Մարդկային գործ չկայ:

Ի՞նչու Անապատ:  Որովհետեւ Ան կ’ուզէ որ մենք լաւ ճանչնանք մեր ինքնութիւնը, անկախ մարդկային գործերէ եւ անոր ընտելանանք զանիկա ապրելով:

Ի՞նչու Փորձութիւն : Աստուած կ’ուզէ որ մեր մէջ արթննայ որդիական իրաւունքին հանդէպ նախանձը ու մեղքին հանդէպ ատելութիւնը:

Ի՞նչու Սատանայէն: Աստուած կ’ուզէ որ մենք յաղթահարենք մեր ներքին վախերն ու ցանկութիւնները (որոնք Սատանային դռներ են) եւ յաղթանակը մեր ձեռքը՝ աշխարհ երթանք ծառայելու:

Երեք Փորձութիւններ

Սատանան ըսաւ անոր. «Եթէ Աստուծոյ Որդին ես...» (Ղկ 4.3ա):

Սատանան կ'արթնցնէ կասկած ինքնութեան վրայ (որ Աստուած դեռ քիչ առաջ երկինքէն յայտարարած էր):

«ըսէ այդ քարին որ հաց ըլլայ» (Ղկ 4.3բ):

Սատանան կ'ուզէ մեզ մղել վստահութեան մը մէջ որ Հօրմէն անջատ է, ինչպէս նաեւ քու պէտքդ կամ փափաքդ հետապնդելու մղում մը կ'արթնցնէ: Սատանան քեզ կը քաջալերէ վստահելու մարմնաւորին վրայ, որ Աստուծոյ դէմ թշնամութիւն է:

Յիսուս պատասխանեց ըսելով՝ «Գրուած է թէ...» (Ղկ 4.4ա):

Կարեւոր է դիմել Խօսքին, կառչիլ Խօսքին եւ զօրութիւն քաղել Խօսքէն:

 «Ո՛չ միայն հացով կ’ապրի մարդ, հապա Աստուծոյ ամէն խօսքով» (Ղկ 4.4բ):

Յիսուս ցոյց կու տայ վստահութիւն Աստուծոյ Խօսքին վրայ եւ ոչ մարմնաւորին (Բ. Կր 10.3-7, Մտ 16.17):

Սատանան Յիսուսին Կը հանէ բարձր լեռ մը: Սատանան քեզի կը խոստանայ բարձր դիրք: Ան սուտ կը խօսի ըսելով թէ ամէն փառք իրեն կը պատկանի եւ կը խոստանայ տալ իշխանութիւն եւ փառք եթէ իրեն երկրպագէ: Սատանան կ’ուզէ Աստուծոյ նման պաշտուիլ:

Իսկ Յիսուս վերստին կը դիմէ ու կը կառչի Խօսքին եւ այդպիսով կը պաշտէ զԱստուած, որ զինք պիտի խիստ բարձրացնէր (Փլպ 2.6-11):

Սատանան  Յիսուսը տարաւ Երուսաղէմ ու տաճարին աշտարակին վրայ կայնեցուց (9), որպէսզի մարդիկ տեսնեն եւ հաւատան: Ան Յիսուսը փորձեց Աստուծոյ Խօսքով : Երբ տեսաւ թէ Յիսուս Աստուծոյ Խօսքին կը կառչի, ինք ալ այդ ճամբով փորձեց խափել, Աստուծոյ Խօսքը փոխելով: 

Սատանան կ’ուզէ որ դուն քու ձեւովդ հռչակես քու փառքդ եւ այդպիսով կորսնցնես Աստուծոյ փառքը որ քու կեանքիդ մէջ է Աստուծոյ հռչակումով ու Սուրբ Հոգիով:

Յիսուս դարձեալ Աստուծոյ Խօսքով պատասխանեց: Աստուծոյ Խօսքը ինքն իրեն չի հակասեր:Սուտ մարգարէութւնները կը փորձուին Աստուծոյ Խօսքով:

«Ու երբ Սատանան ամէն փորձութիւնը կատարեց՝ ատեն մը ետ կեցաւ անկէ» (13):

Սատանային համար բաւական զօրաւոր հարուած էր որ ատեն մը հեռու մնաց (մինչեւ կարծես ետ «ինքզինք գտնէ»):

Մենք եւս մեր անապատին մէջ պէտք է դիմագրաւենք մեր տկարութիւնները եւ կառչինք Աստուծոյ Խօսքին ամէն բանէ վեր:

Կարեւոր չէ ինչքան «պզտիկ»  է տկարութիւնդ եւ ինչքան շատ Աստուծոյ հաճութիւնը շահած ես, եթէ անապատիդ մէջ դէմ չդնես Սատանային, աշխարհի մէջ դիւրութեամբ պիտի իյնաս:

Սատանային մի քանի հարուածով ետ մղենք վստահելով Աստուծոյ հռչակումին ու Խօսքին եւ պատրաստ ըլլանք երբ ան վերադառնայ:

Յաղթանակը մեր ձեռքը՝ երթանք աշխարհ Աստուծոյ ծառայելու համար: